رواية الجن العاشق

الجن العاشق 

 الحلقة الاولى :-

قصتنا خيالية لكن كمان فيها احداث حقيقية اقتبست من استشارة مرت على الكاتب  قبل شهور و بتمنى تتعظو منها

سارة فتاة جميلة جدا بتدرس في الجامعة و زولة عاجباها نفسها جدا و شايفة انو هي جميلة جدا و ماف زول بستاهلها

ماريا جات صحت سارة لانها نائمة للساعة 8

ماريا : يا بت قومي

سارة : يا امي خليني انوم حبة ياخ

ماريا : الشمس بقت نص الضحى و كمان الصبح ما صليتيهو لشنو

سارة : ما علي صلاة يا امي

ماريا : شنو هو ، انت مش قبل اسبوع قلت لي كدة

سارة : يا امي خليني انوم يااااخ ، بعدين بصلي

ماريا : قلت ليك قومي تقوم قيامتك يا بت ، هسي امشي صلي و بطلي اعذارك دي

سارة : خلاص كويس بقوم ، بس خليني خمسة دقايق بس

ماريا : ما عايزة تقومي مش ، انا بعرف اقومك كيف

ماريا تقوم تقفل المروحة و تمشي تفتح الراديو باعلى صوت

و فعلا خطتها تنجح و سارة تقوم من النوم

سارة : و الله زهجتونا ذاتو ،الليلة الجمعة و حتى النوم ما عايزين تخلونا ننومو

ماريا : بنات الناس الزيك بقومو من الدغش بصلو و ينضفو البيت

سارة : و الله انا اعرف بنات الناس ديل وين ، بعمل ليهم ابادة جماعية  ، جايبين لينا الهوى ياخ

سارة تمشي الحمام و تدخل الحمام من غير تتعوذ كالعادة و بتقوم تتحمم و تفضل تعاين لنفسها باعجاب في المرايا ككل مرة و تقول : عسل عسل بس ، فجاءة تحس بحاجة كانها بتتحسس جسمها لكن ما بتهتم بالموضوع و تطلع من الحمام

ماريا : يا بت امشي صلي

سارة : كويس يا امي بمشي اصلي جوا

ماريا : تمام

سارة تدخل غرفتها و ما تصلي و تقعد مسافة و تطلع برا نظام صلت

تقوم تساعد امها في شغل البيت

والد سارة اسمو محجوب و يجي يتكلم مع سارة

محجوب : يا بتي تعالي عايزك في موضوع

سارة : موضوع شنو يا ابوي

محجوب : عاصم كلمني قال لي انو في زول قال عايز عروس و هو رشحك ليهو لانك فيك المواصفات الهو عايزها

سارة : لكن انا ما عايزة اعرس هسي

محجوب : يا بتي دا عاشر عريس ترفضيهو

سارة : بكون زي البقية زول مفلس و معدوم

محجوب : يا بنتي من جاءكم من ترضون خلقه و دينه فزوجوه

سارة : يا ابوي الفلس دا ما حبابو و انا ما بتزوج زول مفلس

محجوب : هسي انا وضعي وسط و الحمد لله قدرت اقريك انتي و اخوانك و اخواتك

سارة : هسي اخواتي كلهم عرسو مفلسين و لي هسي بشيلو منك

محجوب : انا راضي يا بتي و ديل بناتي كمان

سارة : عشان كدة انا ما حتزوج الا زول غني عشان اديك ما اشيل منك

محجوب : الله يهديك يا بتي و انا ما عايز غير استرك بس ، هسي انا اقول للزول شنو

سارة : هو مواصفاتو شنو

محجوب : هو قال لي انو نائب اخصائي و شاب صغير في العمر

سارة : ما تقول كدة من الصباح 😍، طيب انا موافقة اشوفو و ما دام نائب اخصائي اكيد بكون مقرش

محجوب : و الله ما سالت عاصم اذا كان عندو قروش او لا ، بس سالتو من اخلاقو و شكرها لي

سارة : ما دام نائب اخصائي اكيد بكون اخلاقو حلوة و سمح لان القروش بتمشي للسمحين بس و بتسمح الزول

ماريا : ههههههه والله انتي تطلعك دا حيوقعك

سارة : والله الطموح ما عيب

محجوب : طيب هو حيجي المساء بعدين تشوفو بعض و اذا حصل قبول بكلمو يجيب اهلو و نتم الموضوع

سارة : مية مية

سارة تقول في نفسها : لو جاء هسي ما مشكلة لاني واثقة اني حأعجبو لانو جمالي مافيهو اتنين بختلفو فيهو 

و فعلا سارة تلبس فستان و مكياج خفيف و بتطلع جميلة جدا و اي زول لو شافها بنبهر بي جمالها الطبيعي و الفاتن

و جاء عاصم مع العريس و العريس اسمو جمال عشان يشوفو سارة

جمال : السلام عليكم عم محجوب

محجوب : و عليكم السلام

عاصم : طبعا يا عم محجوب ، جمال دا اعز اصدقائي و لمن قال لي عايز يتزوج ما جاء في بالي غير بنتك لانو ما شاء الله ادب و جمال

محجوب : دا من كرم اصلك

جمال : طبعا انا ما شفت بنتك لكن جيت بالسمعة الطيبة و انا بثق في اختيار صديقي عاصم و ان شاء الله يحصل كلو خير

محجوب : تسلم كتيير على كلامك و نحن بنشتري راجل يا ولدي

محجوب و جمال يتعرفو على بعض و محجوب يتكيف منو و من طبعو و من كلامو يقوم ينادي سارة عشان العريس يشوفها و تشوفو

سارة تجي داخلة بي خجل و تسرق النظرات عشان تشوف العريس و يعجبها جدا

لكن غير المتوقع انو العريس لمن شافها قام مخلوع جدا و عاين لصحبو باستغراب لانو شافها مشوهة و قبيحة جدا

الى هنا تنتهي الحلقة الاولى من رواية الجن العاشق نلتقي في الحلقة القادمة ان شاء الله .........

بقلم : تهاني محي الدين

• غرّد
• شارك
• شارك
• شارك
• شارك