رواية الجن العاشق

بسم الله الرحمن الرحيم

الجن العاشق

الحلقة الثانية :-
جمال شاف سارة قبيحة جدا و مشوهة
جمال : الزواج قسمة و نصيب لكن بعتذر ما بقدر اكمل
محجوب : ليه يا ولدي ، في شنو
جمال : مافي حاجة يا عمي لكن اهم حاجة في الزواج الايجاب و القبول و انا ما حاسي باي قبول تجاه بنتكم !
محجوب : وضح ما فهمتك
جمال : بصراحة بنتكم ما عجبتني و انا ما بقدر اعرس واحدة ما حاسي تجاهها باي شعور
محجوب : انت جادي ! ، كيف ما عجبتك
الحضور كلو انصدم سارة و امها و ابوها و عاصم و استغربو من كلام جمال
سارة : انت جايي تهيني في بيتنا ، و كمان تقول علي قبيحة ، انا اجمل بنت في الحلة دي و الكل يشهد بي كدة و انا الما عايزاك بعد دا حتى لو بقيت اخر راجل ، قال ما عجبتني قال 😏
جمال : معليش يا جماعة بعتذر لكن بالجد انا ما شايف اي قبول تجاها و كمان بنتك مشوهة ما قبيحة بس و انا ما حقدر اعيش معاها و لازم يكون في حاجة تسرني فيها
محجوب : انا بنتي ما مشوهة و ما تتكلم فيها كتير و احسن تسكت لحدي هنا ، خير يا ولدي ، الزواج قسمة و نصيب
جمال : طيب بستاذن انا
عاصم : اسف يا عم محجوب و الله ما كنت عايز دا اليحصل
محجوب : ما مشكلة يا ولدي ، اتفضلو
جمال و عاصم يطلعو
عاصم : دا شنو العملتو دا يا جمال ، ليه تحرجني كدة قدام الناس و تعيب البنت
جمال : انت السبب ، انتي ليه تغشني و تقول لي البنت جميلة جدا
عاصم : انت بتستهبل و لا شنو !!!
جمال : كيف بستهبل ، و الله البنت ما قدرت اعاين ليها مرتين من قباحتها
عاصم : استغفر الله العظيم ، و الله العظيم دي اجمل بنت في الحلة و انا لو ما كنت متزوج ما بخليها تضيع من يدي و كمان جبتها ليك عشان انت صحبي و بدور ليك السمح ، كمان هي فيها كل صفاتك
جمال : و الله يا انتو عمانين يا انا عميان ، من قبيل شغالين لي انها جميلة جدا و البت برضو شايفة روحها كدة لكن انا عكسكم تماما
عاصم : يا زول انت الخسران ، تاني امشي اختار بطريقتك و اوعى تقول لي اشوف ليك
جمال : هههههه اصلا تاني توبة ، عشان ما توقعني نفس الوقعة
عاصم : بالجد سبحان الله فيك ، قال سارة قبيحة قال
جمال : و الله الجمال دا نسبي يا اخوي لكن كمان ما اظن للدرجة دي
عاصم : الله يحضرني عرسك عشان اشوف اختيارك ههههه
جمال : طيب هههههههه
في الجانب الاخر
سارة مستاءة جدا و بتكورك
سارة : انا المتخلف دا يقول علي قبيحة
ماريا : ما تزعلي يا بتي ، خلاص انسي الموضوع ، هو الخسران
سارة : كيف انسى الموضوع ، دا اول زول يتجرأ و يقول علي كدة
ماريا : يمكن نظرتو كدة و خلاص كلو قسمة و نصيب ، ما تزعلي روحك و ان شاء الله حتلقي الافضل منو و كلو لخيير
سارة : انا بوريهو كويس ، التافه الكريه
ماريا : العني الشيطان و امشي غرفتك و بطلي تنبزيهو
سارة تدخل غرفتها و الشرار جوا عيونها و تمشي تعاين في المراية و تتكلم مع روحها
سارة : هسي المتخلف دا يقول علي شينة ، ما شاف عيوني و لا قوامي الجذاب
تسمع صوت بقول ليها انتي اجمل بكتيييير
سارة تعاين ورا ما تلقى زول و تقول : شكلي بقيت اتهيا لي لكن كويس يا جمال الكلب و تمشي تنوم
يصبح الصباح و سارة تتشيك و تتجه على جامعتها و كالعادة بدون تصلي الصبح و بدون تحصين
و هي واقفة منتظرة المواصلات تجي عربية برادو مظللة تقيف جنبها و سارة تعاين فيها عشان تحاول تشوف الزول الجواها
بعد دقيقة قزاز العربية نزل و ظهر ليها ولد وسيم جدا جدا و يمكن ما شافت زول في وسامتو قبل كدة و انبهرت بيهو و الزول دا اسمو خالد
خالد : اتفضلي اوصلك معاي
سارة : اسفة ما بركب مع زول غريب
خالد : ما تخافي و انا
سارة : شفتني وين !
خالد : انتي مش بتقري في جامعة السودان
سارة : اي بقرا هناك ، انت عرفت كيف ؟!
خالد : انا جيت قبل كدة وصلت قريبي الجامعة و شفتك هناك و بالجد انتي البشوفك ما بنساك
سارة : تتبسم بخجل و تقول : طبعا انا البشوفني ما بنساني
خالد : اصلا انا شغال قريب لجامعتكم و ممكن اوصلك في سكتي لان المواصلات صعبة
سارة : تتردد اممممم
خالد : ما تخافي ما بخطفك ههههه
سارة : ههههه خلاص طيب ، شكرا ليك لكن بشرط تخلي القزاز نازل
خالد : جدا ، اتفضلي
سارة تركب العربية معاهو و تسرق النظرات لي خالد و تقول في نفسها : دا شنو الولد الوسيم دا ، دا والله البشبهك يا سارة و بستحقك مش الاسمو جمال المعفن الكريه ، انا لازم اتعرف على الولد دا اكتر
خالد : انتي بتقري شنو
سارة : علوم حاسوب
خالد : في سنة كم
سارة : في تالتة و انت شغال شنو
خالد : انا عندي شركة صغيرة حقتي بتاعت استيراد و تصدير و الامور ماشة تمام
سارة : ربنا يساعدك
خالد يتغير فجاءة و تحمر عيونو و يوقف العربية
نلتقي في الحلقة القادمة ان شاء الله ....

بقلم : تهاني محي الدين