رواية الجن العاشق

بسم الله الرحمن الرحيم

الجن العاشق

 

الحلقة الخامسة :-

جمال : دي شنو التخاريف دي ، سحر شنو و عين شنو

عاصم : طيب ليه بتقول شفتها قبيحة امس و هسي شايفها ملاك

جمال : ما عارف والله

عاصم : طيب تعال نلحقها قبل تدخل البيت و اعتذر ليها

جمال : يلا سرعة قبل تدخل ، لاني خجلان اقابل ابوها بعد العملتو ، لازم تسامحني هي اول

جمال و عاصم يسرعو عشان يتكلمو مع سارة قبل تدخل و يحصلوها

عاصم : سارة لو سمحتي اقيفي

سارة : في شنو يا عاصم ، لو عايز تتكلم براك ممكن لكن مع الشخصية دي مستحيل اقيف

جمال : انا اسف والله على العملتو امس و ما قاصد اجرحك

سارة : ما قاصد تجرحني ؟! ، انت قلت علي مشوهة و قبيحة و كمان تقول ما قاصد ، يعني لو كنت قاصد كنت عملت شنو

جمال : انا اسف و غلطان و بعتذر

سارة : عذرك مرفوض

جمال : انا حاصلح غلطي و اجي اطلبك تاني

سارة : ههههههههه ، تجي تطلبني تاني ههههه ، اسمعني هنا و خت الكلام دا حلقة في اضانك ،، احسن ما تجي و تحرج روحك لاني ما حاعرسك حتى لو بقيت اخر راجل ،، هسي زح من قدامي و اوعى اشوف وشك دا تاني

جمال : اي حاجة بتتصلح و اديني اخر فرصة

سارة :عن اذنك يا عاصم ، انا ماشة و فهم الشخصية دي انو ما يوريني وشو تاني و ما يتعرض لي تاني لاني مستحيل ارضى بيهو

و تمشي من جنبهم

جمال : يا خسارة والله ، انا براي ضيعتها من يدي 

عاصم : بالجد ليها حق تقول كدة لانك اهنتها امس و هي زولة كرامتها كبيرة

جمال : حاندم عليها طول عمري

عاصم : ما مشكلة ، يمكن ما في نصيب بس و لخير و تاني اتعلم ما تحرج بنات الناس

جمال : اصلا حتى لو ما عجبتني تاني بت ، حأتم الموضوع ، لكن بعد اقنع من سارة نهائي و ما حافقد الامل و حأديها فترة و ارجع اتقدم تاني يمكن تسامحني

عاصم : هههههه اتحصن بس تاني ، فيك جن انت ههههه ، و زي ما قلت خليها للقسمة ، بالجد ابعد الايام دي لحدي الامور تروق

جمال : كويس بتحصن ، لكن بالجد مستغرب ليه انا شفتها امس كدة ، حاجة تحيير

عاصم : كلو لخيييير

جمال : يمكن لخييير ما معروف

سارة تدخل بيتهم و تسلم على امها و تدخل غرفتها و تشيل ملابس البيت و ماشة على الحمام تتحمم و قبل تمشي على الحمام خالد يتصل عليها

سارة : الو خالد

خالد : وصلتي البيت

سارة : اي وصلت

خالد : لاقيتي منو في طريقك

سارة : عرفت كيف ؟

خالد : اكييد الشارع بكون ما فاضي و طبعا بتكوني لاقيتي زول

سارة : ايوااا ، لاقيت اتنين و سلمت عليهم

خالد : رجال مش

سارة : ايوا رجال و بصراحة واحد فيهم اتقدم لي امس و عمل موقف بايخ و هسي جاء اعتذر و انا رفضت اعتذارو

خالد : اوعي توافقي بأي عريس 

سارة : لشنو 

خالد : بس اسمعي الكلام و انا بوريك لشنو عن قريب

سارة : حاضر ، عايزة اسالك هل انا جميلة

خالد : جميلة دي كلمة بسيطة فيك ، انتي جميلة جدا جدا و عجبتني من اول مرة شفتك فيها

سارة : تشكر كتييييييير و تقول في نفسها مش زي جمال الكريه قال قبيحة انا

خالد : طيب اخليك ترتاحي و تدخلي تستحمي

سارة : كويس !!!!

و تقفل الخط

سارة تقول في نفسها : كانو عايش معانا خالد دا ، عرفني لاقيت ناس و كمان عرفني ماشة اتحمم ! ، لكن احلى حاجة انو ما عايزني اتزوج ودا بعني انو حباني  

و مر اسبوع على معرفة سارة و خالد وطوالي بقى معاها و يوصلها .

بقلم : تهاني محي الدين

• غرّد
• شارك
• شارك
• شارك
• شارك